清明三天假期，丽丽跟仔一班姐妹淘白相得呒没啥闲话讲，爽！弄得伊搿两天，一日到夜贼忒嘻嘻。“倷介开心，捡到金元宝啦？”阿三有点吃弗准伊啥路道了。

　　丽丽想摒牢仔不睬伊，结果一记头喷出来了，“哈哈……”阿三盯牢伊上看下看，“阿是局部进水啦？”“去！侬要么进水了。”丽丽停仔笑，抢白了一句。“侬晓得伐，搿趟白相勿要忒适意喔。我搭伊拉讲，‘搿趟出门阿拉老公全挺张，关照我随便开销。’一班姐妹淘眼乌子快要弹出，‘哦哟，倷阿三灵光咯呀，男人腔调真浓。’侬讲适意伐？嘿嘿……”“嗯，有点意思。开销脱多少啦？”“我阿不晓得，反正拉卡拉到伊拉阿看勿过去。”丽丽又哈哈大笑起来。

　　阿三厥倒。
　　
　　【关键词】勿要忒适意
　　
　　勿要：不要。忒：太。适意：舒坦，合心意。勿要忒适意，就是指太舒坦了。